Mitrovicë: Pastrohet lumi Lushta

Komuna e Mitrovicës ka nisur një aksion për pastrimin e lumit Lushta.

“Ky veprim është i domosdoshëm për të parandaluar daljen e ujit nga shtrati i lumit në rast të reshjeve të shiut,” tha drejtori për Emergjenca Bahtir Maxhuni.

I shoqëruar nga drejtori i Administratës, z. Gëzim Stavileci, Maxhuni inspektoi nga afër punimet.

Pastrimi po bëhet duke filluar nga hyrja e kanalit për të vazhduar në drejtim të lagjes Bair e deri tek fshati Lushtë.

Lushta shkaktoi dëme të mëdha kur doli nga shtrati janarin e kaluar si pasojë e të reshurave të mëdha të shiut.

Mbeturina e materiale inerte bllokuan kanalin e këtij lumi ndërsa uji mori gjithë hapësirat përgjatë tij.

Por ky nuk është lumi i vetëm në Mitrovicë që është i ndotur dhe paraqet rrezik për dalje nga shtrati.
Mbeturinat janë faktor të ndotjes edhe në lumenjtë Ibër, Sitnica e Trepça.

“Kemi në plan për të pastruar të gjithë lumenjtë, për të krijuar siguri dhe ambient të bukur,” shkroi në Facebook nwnkryetari i komunës Arian Tahiri.

Përveç pastrimit, në brigjet e Lushtës u mbollën edhe pemë dhe këtë e bëri organizata 7 Arte nga Mitrovica.