Përkujtohet veprimtari i shquar i çështjes kombëtare Sabit Veseli

Përkujtohet veprimtari i shquar i çështjes kombëtare Sabit Veseli

Me rastin e 13 vjetorit të ndarjes nga jeta, drejtuesit e komunës kanë përkujtuar veprimtarin e shquar të çështjes kombëtare, Sabit Veseli.

Në këtë përvjetor kryetari i komunës, z. Bedri Hamza, nënkryetari, z.Arin Tahiri, së bashku me përfaqësuesit komunal kanë bërë homazhe pranë varrit të të ndjerit në fshatin Broboniq.
Kryetari i komunës, z. Bedri Hamza, duke folur për figurën e patriotit, Sabit Veseli, tha se sot, në 13 vjetorin e ndarjes së tij nga ne, e përkujtojmë me nder dhe respekt të madh njërin nga djemtë më të vyer të këtij vendi, njërin nga djemtë me të përkushtuar e më të devotshëm të çështjes kombëtare në këto anë.

“Sabit Veseli dhe të gjithë heronjtë e dëshmorët e kombit, që janë burim frymëzimi dhe inspirimi për ne, e që duhet të jenë burim frymëzimi edhe për brezat e ardhshëm, nuk do ti nderojmë mjaftueshëm nëse nuk reflektojmë drejtë e mençur për obligimet dhe përgjegjësitë tona, kolektive, individuale dhe institucionale në raport me sakrificën e dëshmorëve dhe heronjve tanë dhe amanetet e tyre për vendin tonë. I përjetshëm qoftë kujtimi për Sabit Veselin dhe për të gjithë dëshmorët e kombit”, ka thënë kryetari Hamza.