Mitrovicë: mbyllet lokali se bëri shumë zhurmë

Për shkak të prishjes së qetësisë publike një lokal nate në Mitrovicë është mbyllur përkohësisht nga inspektorati komunal.

Kjo ndodhi derisa inspektorët po kontrollonin bizneset për respektimin e orarit të punës dhe për nvelin e zhurmës së shkaktuar nga ana e tyre.

“Gjatë inspektimeve të kryera, në rrugën “Mbretëresha Teutë”, është bërë mbyllja e një lokali të natës ku si pasojë e zhurmës është shkaktuar prishje e rendit dhe qetësisë publike,” kanë thënë nga Komuna e Mitrovicës.

Drejtori i Inspeksionit në Komunë, Valon Brahimi, ka thënë se ditëve të fundit ka pranuar disa ankesa dhe shqetësime të ngritura nga qytetarët e Mitrovicës, lidhur me zhurmën që po shkaktohet nga lokalet e natës duke u kthyer kështu në burim shqetësues për rendin dhe qetësinë e qytetarëve.

“Do të ketë kontrolle edhe më të rrepta në këto lokale të cilat nuk e respektojnë rendin dhe qetësinë publike, ashtu siç është paraparë me dispozita ligjore,” ka shtuar tutje Brahimi.