Nënshkruhen kontratat me 79 përfituesit e serrave

Nënshkruhen kontratat me 79 përfituesit e serrave

Komuna e Mitrovicës në bashkëpunim me organizatën “Islamic Relief Kosova” në kuadër të nënshkrimit të marrëveshjes së bashkëpunimit kanë realizuar me sukses projektin për subvencionimin e fermerëve me serra, me të cilët sot kanë nënshkruar kontratat.

Në ceremoninë e nënshkrimit të këtyre kontratave morën pjesë kryetari i komunës, z. Bedri Hamza, përfaqësuesja e organizatës “Islamic Relief Kosova”, znj. Albulena Gashi, si dhe drejtori për Bujqësi dhe Zhvillim Rural, z. Ferdi Kadriu.

Me rastin e nënshkrimit të kontratave, kryetari z. Hamza, pasi ka falënderuar për mbështetjen e dhënë në realizimin e këtij projekti “Islamic Relief Kosova”, uroi fermerët përfitues, duke u thënë atyre se këto serra do t’u ndihmojnë për kultivimin e prodhimeve vendore, gjë që do të thotë se kjo mbështetje është e mirëseardhur edhe për furnizimin e tregut me kultura bimore.

Marrëveshja e bashkëpunimit në mes të Komunës së Mitrovicës dhe “Islamic Relief Kosova” përfshin shumën mbi 300 mijë euro, përmes të cilës pritet të realizohen edhe projekte tjera gjatë këtij viti, duke shpërndarë grante të ndryshme bujqësore për fermerët.