Mitrovicë: Mbahet konferenca “Praktikat e mira të mësimdhënies- përvojat dhe perspektiva për të ardhmen”

Në ambientet e Universitetit “Isa Boletini” në Mitrovicë sot është mbajtur konferenca me temën “Praktikat e mira të mësimdhënies; përvojat dhe perspektiva për të ardhmen”.

Kjo konferencë është organizuar nga Drejtoria Komunale e Arsimit në bashkëpunim me partnerin lokal CMG “Consulting and Menagement Group”, përmes së cilës synonin identifikimin dhe promovimin e praktikave të mira të mësimdhënies dhe të nxënit.

Pjesëmarrës në këtë konferencë ishin kryesuesja e Kuvendit Komunal, znj.Vesa Broja, drejtoresha e Drejtorisë së Arsimit, znj.Drita Kadriu, mësimdhënës, studiues, profesorë universitar, udhëheqës arsimorë, si dhe studentë. Gjithashtu kishte mysafir prezent edhe nga Amerika, Dr.Christopher Hass, në Universitetin “James Madison”, pedagogu nga Austria, z.Hazir Mehmeti, si dhe nga Shqipëria Dr.Bardhyl Musai.

Në fjalën e saj, kryesuesja e Kuvendit Komunal znj.Vesa Broja, ka përgëzuar për iniciativën në organizimin e kësaj konference me qëllim që të mësohen përvojat strategjike të suksesshme të mësimdhënies dhe të nxënit.

Ndëra drejtoresha e DKA-së, znj. Kadriu, u shpreh e lumtur që së bashku me mësimdhënës të pasionuar për profesion, kanë realizuar këtë konferencë të parë, si aktivitet shumë i rëndësishëm për arsimin në vend.

Temat të cilat u diskutuan në këtë konferencë ishin; Praktikat e mira mësimore në edukimin e hershëm; Inovacionet në mësimdhënie në shkollën fillore, të mesme të ulët dhe të mesme të lartë; Roli i udhëheqjes në rritjen e rezultateve të të nxënit dhe Njohje të reja për të mësuarit social- emocional.

Kjo konferencë do të zgjasë dy ditë.