Komuna e Mitrovicës mundëson praktikë me pagesë për të rinjtë me aftësi të kufizuara

Sabrush Çabra mori sot një lajm të mrekullueshëm gjat takimit që pati me drejtoreshën për Kulturë Rini dhe Sport në Komunën e Mitrovicës, Valdete Idrizi.

Ai u njoftua se Komuna e Mitrovicës do t’u mundësoj trajnim dhe punë praktike me pagesë të rinjëve me aftësi të kufizuara në Mitrovicë.

Iniciativa është e drejtorit për Ekonomi, Zhvillim dhe Turizëm në komunë, Elvis Feka, tha drejtoresha Idrizi.

“Me shumë kënaqësi e njoftova Sabrushin për mundësinë e re që Komuna e Mitrovicës ofron praktikë me pagesë për të rinjtë me aftësi të kufizuar, konkretisht Drejtoria për zhvillim dhe turizëm. Iniciativë kjo e drejtorit Elvis Feka, që ishte shumë e nevojshme, në fakt e domosdoshme,” shkroi ajo në Facebook.

Ndërkohë në thirrjen publike për aplikim, Drejtoria për Ekonomi, Zhvillim, Turizëm dhe Integrime Evropiane fton personat me aftësi të kufizuara të moshës 18-35 vjeç që të aplikojnë për skemën trajnim dhe praktikë në punë, në biznese, OJQ dhe Institucione Publike.

Kohëzgjatja e trajnimit dhe punës praktike do të jetë 6 muaj, jo më shumë se 20 orë në javë, ndërsa të përzgjedhurve do t’u kompensohen 220 euro si ndihmë financiare.

Dokumentet për aplikim janë te renditura në fotografinë e publikuar më poshtë.