Lajme
Në Mitrovicë u mbajt mbledhja e bordit të drejtorëve komunal
- 30/08/2021
- By RTV Mitrovica
Drejtuar nga nënkryetari i komunës, Faruk Mujka, dhe në prani të drejtorëve të drejtorive komunale, sot është mbajtur mbledhja e radhës e Bordit të Drejtorëve, ku janë diskutuar dhe shqyrtuar çështje të rëndësishme nga fushëveprimi i Bordit dhe drejtorive komunale.
Fillimisht në këtë mbledhje, shefi i sektorit për Buxhet dhe Financa, Zenel Çitaku, ka njoftuar ekzekutivin lidhur me përfundimin e të gjitha procedurave të nevojshme të përgatitjes së Buxhetit Komunal 2022-2024, për të cilin paraprakisht janë mbajtur dëgjimet publike me qytetarë dhe me drejtorët e drejtorive komunale, dhe se para datës 1 shtator ky dokument do të dërgohet për shqyrtim në mbledhjen e Komitetit për Politikë dhe Financa, e më tutje për miratim në Kuvendin Komunal.
Ndërkaq, drejtori i Arsimit, Skender Avdiu, ka informuar lidhur me mbarëvajtjen e pjesës së dytë të Testit të Maturës, ku sipas drejtorit gjithçka ka shkuar në bazë të kritereve të duhura, dhe nuk ka pasur asnjë problem gjatë tërë procesit të testimit.
Drejtoresha Erseka Hasanaj Barani, ka thënë se në Mitrovicë aktualisht janë 1214 raste pozitive aktive me virusin Covid-19, ku ka bërë apel tek qytetarët të kryejnë vaksinimin, dhe të mbajnë maska mbrojtëse në mënyrë që të ruajmë shëndetin publik të të gjithëve.